काठमाडौँ । भोटेकोसी नदीमा आएको भीषण बाढीबाट प्रभावितको खोज तथा उद्धारका लागि नेपाली सेनाको टोली व्यापक रूपमा परिचालन गरिएको छ।

आज बिहान भोटेकोसी नदीमा आएको बाढीले टिमुरे, स्याफ्रुबेँसीलगायतका तटीय क्षेत्रमा ठूलो क्षति पुर्‍याएको जानकारी प्राप्त हुनासाथ सेनाको उद्धार टोली घटनास्थलतर्फ परिचालन गरिएको सैनिक जनसम्पर्क तथा सूचना निर्देशनालयले जनाएको छ।

सैनिक मुख्यालयका अनुसार खोज तथा उद्धार कार्यलाई तीव्र बनाउन सेनाका दुईवटा हेलिकप्टर त्रिशूली बजारमा अवतरण गरिसकेका छन्। घाइतेहरूको उपचारका लागि त्रिशूली जिल्ला अस्पतालमा आपत्कालीन मेडिकल टोलीसमेत परिचालन गरिएको छ।

उद्धार कार्यका लागि धुन्चे र त्रिशूलीस्थित सैनिक ब्यारेकबाट टोलीहरू प्रभावित क्षेत्रतर्फ खटिएका छन्। त्यस्तै, धादिङको गजुरीस्थित ६ नम्बर बाहिनी अड्डाबाट विपद् व्यवस्थापनमा तालिमप्राप्त दक्ष जनशक्तिलाई समेत परिचालन गरिएको सेनाले जनाएको छ।