विराटनगर । विराटनगर–४ इक्राही नहरस्थित धान खेतमा सालनालसहितको नवजात शिशु फेला परेको छ। जिल्ला प्रहरी कार्यालय मोरङका अनुसार सेतो प्लास्टिकको बोरामा राखिएको अवस्थामा सालनालसहितको नवजात शिशु (छोरा) फेला परेको हो।

स्थानीयवासीले शिशु रोएको आवाज सुनेपछि प्रहरीलाई खबर गरेका थिए। स्थानीयको सहयोगमा प्रहरीले शिशुको उद्धार गरी उपचारका लागि नोबेल शिक्षण अस्पताल ल्याएको हो। शिशुको स्वास्थ्य अवस्था सामान्य रहेको जिल्ला प्रहरी कार्यालय मोरङका प्रवक्ता डीएसपी सन्तोष श्रेष्ठले जानकारी दिए।
उनका अनुसार घटनाबारे अनुसन्धान गर्न जिल्ला प्रहरी कार्यालय मोरङ र एसओएस विराटनगरसहितको टोली परिचालन गरिएको छ।