विराटनगर । ऐतिहासिक राधाकृष्ण रथयात्रा यस वर्ष भदौ २० गते शनिबार हुने भएको छ। रथयात्राको तयारीबारे आयोजक समितिले आज पत्रकार सम्मेलन आयोजना गरी जानकारी दिएको हो।
आयोजक समितिका अनुसार कृष्ण जन्माष्टमीको भोलिपल्ट भदौ २० गते शनिबार दिउँसो ३ बजे विराटनगर–१ स्थित राधाकृष्ण मन्दिरबाट रथयात्रा निकालिनेछ। रथयात्रामा ठूलो संख्यामा भक्तजन तथा श्रद्धालुको सहभागिता रहने अपेक्षा गरिएको छ।

पत्रकार सम्मेलनमा मन्दिर व्यवस्थापन समितिले रथयात्राका क्रममा संकलन हुने भेटी रकम बाढीपीडितको सहयोगमा खर्च गरिने जानकारी दिएको छ। विपद्बाट प्रभावित परिवारलाई राहत तथा सहयोग पुर्‍याउने उद्देश्यले भेटी रकम परिचालन गरिने समितिले जनाएको छ।

रथयात्रालाई व्यवस्थित, सुरक्षित र शान्तिपूर्ण रूपमा सम्पन्न गर्न आवश्यक तयारी भइरहेको आयोजक समितिले जनाएको छ।