विराटनगर । सार्वजनिक स्थानमा युवतीमाथि अभद्र व्यवहार गरेको आरोपमा मोरङ प्रहरीले दुई जनालाई पक्राउ गरेको छ।

जिल्ला प्रहरी कार्यालय मोरङका अनुसार विराटनगर महानगरपालिका–६ स्थित महेन्द्र चोकमा युवतीमाथि अभद्र व्यवहार गरेको भिडियो सामाजिक सञ्जालमार्फत प्राप्त भएपछि प्रहरीले अनुसन्धान अघि बढाएको थियो।

प्रहरीले भिडियोमा देखिएका व्यक्तिहरूको पहिचान गरी खोजतलास गर्ने क्रममा विराटनगर–६ का ३२ वर्षीय महेन्द्र कुमार मण्डल र विराटनगर–९ का ३३ वर्षीय अभिलेष कुमार प्रसादलाई पक्राउ गरेको जनाएको छ।

उनीहरूलाई विराटनगर रानी क्षेत्रबाट पक्राउ गरी अभद्र व्यवहारसम्बन्धी मुद्दामा म्याद थप गरी थप अनुसन्धान भइरहेको जिल्ला प्रहरी कार्यालय मोरङले जनाएको छ। प्रहरीले सार्वजनिक स्थानमा हुने यस्ता दुर्व्यवहारका घटनामा संलग्नलाई कानुनी दायरामा ल्याउने जनाएको छ।