काठमाडौं । जिल्ला प्रशासन कार्यालय गोरखाले मनास्लु र लार्केपास पदमार्ग हुँदै यात्रा नगर्न आग्रह गरेको छ। प्रशासनले आइतबार सार्वजनिक सूचना जारी गर्दै यात्राको तयारीमा रहेका तथा पदयात्रामा निस्किसकेका पर्यटकलाई अर्को सूचना जारी नभएसम्म यात्रा नगर्न आग्रह गरेको हो।

आइतबार बिहान चुमनुव्री गाउँपालिका–४, नामरुङस्थित थेराङ खोलामा आएको बाढीले उक्त क्षेत्रमा पदमार्ग, होटल तथा जलविद्युत् आयोजनामा ठूलो क्षति पुर्‍याएको प्रशासनले जनाएको छ।

बाढीले चुमनुव्री गाउँपालिका–४ र वडा नम्बर २ जोड्ने फलामे पुल तथा गाउँपालिकादेखि नामरुङ जंगल जाने बूढीगण्डकी नदीमाथिको झोलुंगे पुलसमेत बगाएको छ।

जिल्ला प्रशासन कार्यालय गोरखाले जारी गरेको सूचनामा भनिएको छ, ‘मिति २०८३ भदौ २१ गते बिहान करिब ३स्३० बजे चुमनुव्री गाउँपालिका–४, नामरुङस्थित थेराङ खोलामा बाढी आई चुमनुव्री गाउँपालिका–४ र २ जोड्ने फलामे पुल तथा गाउँपालिकादेखि नामरुङ जंगल जाने बूढीगण्डकी नदीको झोलुंगे पुलसमेत बगाएको हुँदा मनास्लु पदमार्ग वा लार्केपास पदमार्गमा यात्राको तयारीमा रहेका तथा यात्रामा रहेका पदयात्रीहरूले अर्को सूचना प्रकाशित नभएसम्म पदयात्रा नगर्नुरनगराउनुहुन सम्बन्धित सबैको जानकारीका लागि यो सूचना प्रकाशित गरिएको छ।’

प्रशासनले पदयात्रीको सुरक्षा तथा सम्भावित जोखिमलाई मध्यनजर गर्दै अर्को सूचना जारी नभएसम्म यात्रा रोक्न आग्रह गरेको हो।