काठमाडौं । नेपाल एसीसी प्रिमियर कपको विजेता बन्दै एसिया कपका लागि छनोट भएको छ। शनिबार मलेसियाको वायुमास ओभलमा भएको फाइनलमा यूएईलाई ४४ रनले पराजित गर्दै नेपालले एसिया कपमा स्थान पक्का गरेको हो।

नेपालले दिएको ३१४ रनको लक्ष्य पछ्याएको यूएई ४९.१ ओभरमा २६९ रनमा अलआउट भयो। यूएईका लागि राहुल चोपराले अविजित शतक बनाए पनि टोलीलाई जित दिलाउन सकेनन्। तनिश सुरीले ४२ तथा कप्तान हरप्रित भाटियाले ३३ रन बनाए।

नेपालका लागि करण केसीले तीन विकेट लिए। ललित राजवंशीले दुई विकेट लिँदा कप्तान सन्दीप लामिछाने, रोहित पौडेल, गुल्शन झा, बसिर अहमद र दीपेन्द्रसिंह ऐरीले एक–एक विकेट लिए। यसअघि टस जितेर पहिले ब्याटिङ गरेको नेपालले निर्धारित ५० ओभरमा नौ विकेट गुमाएर ३१३ रनको बलियो योगफल तयार गरेको थियो।

नेपालका लागि आसिफ शेखले उत्कृष्ट शतकीय इनिङ खेले। उनले १०६ बलमा आठ चौका र चार छक्कासहित १०२ रन बनाए। गुल्शन झाले ३८ बलमा तीन चौका र चार छक्कासहित ५२ रन जोडे। अर्जुन कुमालले ४३ तथा रोहित पौडेलले ४० रन बनाए। आसिफले आफ्नो ओडीआई करियरको दोस्रो शतक पूरा गरेका हुन्।