काठमाडौं । नेपाली सेनाका प्रधानसेनापति अशोकराज सिग्देल चीन प्रस्थान गरेका छन् । जंगी अड्डाका अनुसार उनी २८ भदौदेखि ३ असोजसम्म चीन भ्रमणमा रहनेछन् ।

भ्रमणका क्रममा प्रधानसेनापति सिग्देलले बेइजिङमा आयोजना हुने १३औँ बेइजिङ स्याङसन फोरममा सहभागिता जनाउनेछन् । त्रिभुवन अन्तर्राष्ट्रिय विमानस्थलमा उनलाई बलाधिकृत रथी प्रदीपजंग केसीले बिदाइ गरेका थिए ।

भ्रमणले दुई देशबीचको सैनिक सम्बन्ध विस्तार गर्नुका साथै सैनिक कूटनीतिमार्फत नेपालको परराष्ट्र नीतिमा समेत योगदान पुग्ने विश्वास लिइएको छ । प्रधानसेनापति सिग्देल चीन भ्रमणमा रहेका बेला बलाधिकृत रथी केसीले कायममुकायम प्रधानसेनापतिको जिम्मेवारी सम्हाल्नेछन् ।