काठमाडौं । गत १० भदौमा आएको विनाशकारी बाढीबाट विस्थापित परिवारलाई सरकारले सहायता रकम उपलब्ध गराउने भएको छ । गत बिहीबार बसेको मन्त्रिपरिषद् बैठकले भोटेकोशी बाढी प्रभावित परिवारलाई स्थायी आवास निर्माण नभएसम्म आवास भाडा तथा अन्य आवश्यक खर्च व्यवस्थापनका लागि रकम उपलब्ध गराउने निर्णय गरेको सञ्चारमन्त्री विक्रम तिमिल्सिनाले जानकारी दिएका छन् ।

उनका अनुसार चार सदस्यसम्मको परिवारलाई मासिक १५ हजार रुपैयाँ र चारभन्दा बढी सदस्य भएका परिवारलाई थप प्रत्येक सदस्यका लागि मासिक २ हजार रुपैयाँका दरले अतिरिक्त रकम उपलब्ध गराइनेछ ।

यदि कुनै परिवारले उक्त रकम लिन नचाहेमा सरकारले स्थायी आवास निर्माण नभएसम्म अस्थायी आवासको व्यवस्था गर्ने विकल्पसमेत उपलब्ध गराएको मन्त्री तिमिल्सिनाले बताएका छन् । यस सम्बन्धमा आवश्यक विवरण संकलन गर्न सबै सम्बन्धित स्थानीय तहमा फारम पठाइसकिएको जानकारी पनि मन्त्री तिमिल्सिनाले सामाजिक सञ्जालमार्फत दिएका छन् ।