काठमाडौं । कराते खेलाडी एरिका गुरुङ एसियाली खेलकुदअन्तर्गत महिला कुमुते ६८ केजी माथिको सेमिफाइनलमा प्रवेश गरेकी छन् । एरिकाको सेमिफाइनल प्रवेशसँगै नेपालले कम्तीमा एक कांस्य पदक पक्का गरेको छ । करातेमा सेमिफाइनलमा पराजित हुने खेलाडीलाई पनि कांस्य पदक प्रदान गरिन्छ ।

गत संस्करणकी रजत पदक विजेता एरिकाले आइतबार तोयोहाशी जिम्नाजियममा भएको क्वार्टरफाइनलमा जोर्डनकी यारा नासेरलाई ७–१ ले पराजित गर्दै अन्तिम चारमा स्थान बनाएकी हुन् ।

अब एरिकाले सेमिफाइनलमा काजकिस्तानकी सोफिया बेरुल्तसेभासँग प्रतिस्पर्धा गर्नेछिन् । एरिकाको सेमिफाइनल प्रवेशसँगै नेपालले करातेबाट कम्तीमा तीन पदक पक्का गरेको छ । यसअघि पुरुष कुमुते ६० केजीमुनिमा मीनबहादुर तामाङ र ५५ केजीमुनिमा राकेश मानन्धरले सेमिफाइनलमा स्थान बनाएपछि नेपालको दुई पदक पक्का भइसकेको थियो ।