पेरिस । जलवायु परिवर्तन, बढ्दो तापक्रम र खडेरीको असर फ्रान्सको प्रसिद्ध वाइन उद्योगमा गहिरिँदै गएको छ। प्रतिकूल मौसमका कारण सन् २०२६ मा फ्रान्सको वाइन उत्पादन करिब सात दशकयताकै न्यून स्तरमा झर्न सक्ने अनुमान गरिएको छ।

गर्मीका कारण अङ्गुर समयअगावै पाक्न थालेका छन्। बर्गन्डी क्षेत्रमा यस वर्ष अगस्ट १४ मै अङ्गुर टिप्न थालिएको थियो, जुन त्यहाँको इतिहासमै सबैभन्दा छिटो हो। सन् १९३० को दशकको तुलनामा अहिले अङ्गुर टिप्ने समय करिब एक महिनाअघि सरेको उत्पादकहरूको भनाइ छ।

जलवायु परिवर्तनको असर भने सबै क्षेत्रमा समान छैन। लोयर भ्याली र श्याम्पेनमा गर्मी र खडेरीको प्रभाव बढी देखिए पनि बोर्डो तथा लाङ्गदोक रुसियोनका केही क्षेत्रमा उत्पादन बढेको छ।

बदलिँदो मौसमले पुराना वाइन उत्पादन नियममाथि पनि प्रश्न उठाएको छ। अङ्गुरका जात, खेती प्रणाली र सिँचाइमा कडा नियमका कारण उत्पादकलाई अनुकूलन गर्न कठिन भइरहेको उद्योगका प्रतिनिधिहरू बताउँछन्।

यससँगै उत्पादन लागत बढ्नु, बिक्री र घरेलु खपत घट्नुले आर्थिक संकट थप गहिर्याएको छ। माग घटेपछि बोर्डोमा सन् २०२३ यता करिब २० हजार हेक्टरका अङ्गुरका बोट उखेलिसकिएका छन्।

फ्रान्सेलीको वाइन सेवन पनि दशकौँमा उल्लेख्य घटेको छ। सन् १९६० मा करिब आधा जनसङ्ख्याले दैनिक वाइन सेवन गर्ने गरेकोमा सन् २०१८ सम्म यो अनुपात १० प्रतिशतभन्दा तल झरेको थियो।

यसरी फ्रान्सको वाइन उद्योग अहिले जलवायु परिवर्तन, घट्दो उत्पादन, कडा परम्परागत नियम र कमजोर मागको दोहोरो दबाबमा छ। बदलिँदो मौसमअनुकूल खेती र बजार रणनीति अपनाउने गति उद्योगको आगामी भविष्यका लागि निर्णायक हुने देखिन्छ।