काठमाडौं । आइतबारदेखि पूर्वी नेपालबाट वर्षाको क्रम घट्ने भएको छ । तर अन्य प्रदेशमा भने मंगलबारसम्मै वर्षा हुने प्रक्षेपण गरिएको छ ।

नेपालमा हाल मनसुनको सक्रिय उत्तरार्ध चरणसँगै बंगालको खाडीबाट आएको न्यूनचापीय प्रणाली र सुदूरपश्चिममा रहेको कमजोर पश्चिमी वायुको संयुक्त प्रभावका कारण देशभरी व्यापक वर्षा भइरहेको छ।

जल तथा मौसम विज्ञान विभागको वर्षा निगरानी अनुसार पाल्पाको अर्चले (लुम्बिनी प्रदेश) मा सर्वाधिक २०५.२ मिमी वर्षा मापन गरिएको छ।

पूर्वी लुम्बिनी, गण्डकी र बागमती प्रदेशका धेरै मध्यपहाडी तथा भित्री तराईका स्टेसनहरूमा ८० देखि १२० मिमी वर्षा भएको छ। यो परिमाण धेरै भारी देखि अति भारी वर्षाको वर्गमा पर्दछ।

जल तथा मौसम विज्ञान विभागको पछिल्लो मोडल चक्रअनुसार असोज ९ (शुक्रबार) र १० गते (शनिबार) वर्षाको चरम अवस्था रहनेछ, जसका लागि मध्य तथा पश्चिमी भूभागमा रातो र सुन्तला रङको उच्च सतर्कता चेतावनी जारी गरिएको छ।

विभागको पछिल्लो मोडलले आगामी ४८ घण्टासम्म वर्षा रहने देखाएको छ। मुख्य भारी वर्षाको केन्द्र सुरुमा मध्य र पश्चिमी पहाडमा रहने र क्रमशः पश्चिमी उत्तर प्रदेशतर्फ सर्दा वर्षाको केन्द्र पनि पश्चिमतिर सर्नेछ।

एआई आधारित प्रणालीहरूले गण्डकी र लुम्बिनीसहित शनिबार राति र आइतबार बिहान पश्चिमी भूभामा तीव्र वर्षाको सम्भावना देखाएका छन्।

आइतबारदेखि पूर्वी क्षेत्रबाट मौसममा क्रमिक सुधार आउँदै असोज सोमबार र मंगलबार सम्ममा देशैभरि मौसम सामान्य हुने देखिन्छ।

प्रदेशगत रूपमा हेर्दा, कोशी र मधेश प्रदेशमा असोज ९ गते भारी देखि धेरै भारी वर्षा भए तापनि असोज १० गतेबाट वर्षाको तीव्रता घट्दै मौसममा सुधार आउनेछ।

बागमती र गण्डकी प्रदेशका काठमाडौँ उपत्यका, पोखरा लगायत मध्यपहाडी क्षेत्रमा असोज ९ र १० गते भारी देखि धेरै भारी वर्षाको जोखिम उच्च छ भने असोज ११ पछि वर्षा कम हुनेछ।

लुम्बिनी, कर्णाली र सुदूरपश्चिम प्रदेशमा आगामी ५ दिनको कुल वर्षा सर्वाधिक हुने अनुमान छस विशेष गरी असोज ९ र १० गते लुम्बिनी तथा असोज १० र ११ गते कर्णाली र सुदूरपश्चिमका धेरै स्थानमा धेरै भारी र १/२ स्थानमा अति भारी वर्षाको सम्भावनासहित उच्च जोखिम रहनेछ।