विराटनगर । रसुवाको भोटेकोशी नदीमा बुधबार बिहान आएको बाढीबाट प्रभावित तथा पीडित परिवारको राहतका लागि पूर्व प्रहरी प्रमुख (आईजीपी) चन्द्रकुबेर खापुङले आफ्नो एक महिनाको पेन्सन रकम प्रधानमन्त्री दैवी प्रकोप उद्धार कोषमा सहयोग गरेका छन्।

बाढीका कारण प्रभावित नागरिकको उद्धार, राहत तथा पुनः स्थापनामा सहयोग पुगोस् भन्ने उद्देश्यले आफूले एक महिनाको पेन्सन रकम प्रधानमन्त्री राहत कोषमा प्रदान गरेको खापुङले बताएका छन्। उनले विपद्को यस कठिन घडीमा बाढीपीडितको राहत र उद्धारका लागि सबैलाई आ–आफ्नो क्षेत्रबाट सहयोग गर्नसमेत आग्रह गरेका छन्।

भोटेकोशी नदीमा आएको बाढीबाट रसुवाका विभिन्न क्षेत्रमा जनधनको क्षति भएको छ। बाढीपीडितको तत्काल उद्धार, राहत तथा पुनः स्थापनाका लागि सरकारी तथा गैरसरकारी क्षेत्रबाट सहयोग जुटाउने क्रम जारी रहेको छ।