काठमाडौं । भदौ १० गते रसुवामा आएको बाढीका क्रममा विभिन्न जलविद्युत् आयोजनाका सुरुङभित्र १२१ जना फसेको अनुमान नेपाली सेनाले गरेको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले सोमबार आयोजना गरेको पत्रकार सम्मेलनमा नेपाली सेनाका सहायक रथी सुवासजंग थापाले सुरुङभित्र १२१ जना पसेको तथ्य देखिएको बताएका हुन्।

‘१२१ जनामात्रै टनेलभित्र पसेको तथ्य देखिन्छ,’ उनले भने, ‘जबसम्म सबै टनेल ब्रेकथ्रु हुँदैन, त्यसबेलासम्म हामी खोजी तथा उद्धारको काम जारी राखिरहन्छौं।’

उनले जलविद्युत् आयोजनामा कार्यरत अन्य व्यक्तिहरू बाहिरी क्षेत्रमा परेको हुन सक्ने पनि अनुमान गरिएको बताए।

सहायक रथी थापाका अनुसार जलविद्युत् आयोजनाका सुरुङमा भएको क्षतिको आकलन गर्दा बाढी र लेदो करिब १८० किलोमिटर प्रतिघण्टाको गतिमा खसेको अनुमान गरिएको छ।