काठमाडौं । नेपाली कांग्रेसका सभापति गगनकुमार थापाले असोज १६ गते हुने पार्टीको महाधिवेशनको उद्घाटन सत्रमा सहभागी हुन पूर्वसभापति शेरबहादुर देउवालाई आग्रह गरेका छन् ।

बिहीबार पार्टीको केन्द्रीय कार्यसमिति बैठकलाई सम्बोधन गर्दै थापाले महाधिवेशनको उद्घाटन पूर्वसभापति देउवाले गरिदिँदा आफूहरूका लागि सम्मानको विषय हुने बताएका हुन् ।

‘मेरो आदरणीय नेता पूर्वसभापति शेरबहादुर देउवालाई आग्रह गर्न चाहन्छु । कतिपय साथीहरूले पनि भन्नुभएको छ, अधिवेशनको दिनमा पूर्व पार्टी सभापतिले अधिवेशनको उद्घाटन गरिदिने कुरा हाम्रा निम्ति सम्मानको विषय हुन्छ,’ थापाले भने ।

थापाले पार्टी विधानअनुसार अब देउवा सभापति बन्न नसक्ने उल्लेख गर्दै महाधिवेशनमा सहभागी हुन आग्रह गरे । ‘पार्टीको विधानले पनि त्यही भन्छ । उहाँ अब पार्टीको सभापति बन्ने होइन,’ उनले भने ।

थापाका अनुसार असोज १६ गते काठमाडौंको खुलामञ्चमा महाधिवेशनको उद्घाटन गरिनेछ । त्यसअघि असोज ३ र ४ गते वडा अधिवेशन हुनेछ भने त्यसपछि नगर अधिवेशन गरिनेछ ।

उनले जिल्ला र प्रदेश अधिवेशनका लागि समयको चाप रहेकाले पार्टीका नेताकार्यकर्तासँग थप छलफल गर्दै अघि बढ्नुपर्ने बताए । पार्टीको एकताका लागि सबै पक्ष उभिनुपर्नेमा पनि उनले जोड दिए ।