विराटनगर । नेपाली कांग्रेसको १५औँ महाधिवेशनअन्तर्गत विराटनगर महानगरपालिका–१ बाट ३५ वर्षमुनिको युवा कोटातर्फ एकै परिवारका दुई दाजुभाइ क्षेत्रीय प्रतिनिधिमा निर्विरोध निर्वाचित भएका छन्।

२९ वर्षीय अभिषेक भट्टराई र उनका भाइ २६ वर्षीय गौरव भट्टराई युवा क्षेत्रीय प्रतिनिधिमा सर्वसम्मत निर्वाचित भएका हुन्। दुवै दाजुभाइ सानैदेखि राजनीतिक तथा सामाजिक गतिविधिमा रुचि राख्दै आएका छन्।

अभिषेक यसअघि नेपाली कांग्रेसको १४औँ महाधिवेशनमा निर्वाचनमार्फत क्षेत्रीय प्रतिनिधिमा निर्वाचित भएका थिए। उनी नेपाल विद्यार्थी संघको केन्द्रीय सदस्यसमेत भइसकेका छन्। यसपटक भने अभिषेकसँगै उनका भाइ गौरव पनि युवा क्षेत्रीय प्रतिनिधिमा निर्विरोध निर्वाचित भएका हुन्। एउटै परिवारका दुई युवा दाजुभाइ एकैपटक क्षेत्रीय प्रतिनिधिमा सर्वसम्मत निर्वाचित भएपछि विराटनगर–१ को कांग्रेस राजनीतिमा उनीहरूको चर्चा बढेको छ।

पछिल्लो पुस्ताको राजनीतिक सहभागितालाई प्रतिनिधित्व गर्ने यी दाजुभाइलाई कांग्रेसभित्र ‘जेनजी पुस्ताका युवा प्रतिनिधि’ का रूपमा समेत हेरिएको छ। राजनीतिक गतिविधिसँगै सामाजिक क्षेत्रमा पनि सक्रिय उनीहरूको सर्वसम्मत चयनले पार्टी संगठनमा युवाको सहभागिता बढ्दै गएको संकेत गरेको छ।