पाँचथर । पाँचथरमा श्रीमानको किरियामा बसेका बेला आगोले जलेर घाइत वृद्धाको उपचारका क्रममा मृत्यु भएको छ ।

श्रीमान भगीरथ सापकोटाको किरियामा बसेका बेला सिलिण्डर ग्यास लिक भएर आगो लाग्दा जलेर घाइते भएकी फिदिम नगरपालिका–४ की ७२ वर्षीया चनमाया सापकोटाको मृत्यु भएको हो ।

सोमबार राति भएको आगालागीको घटनामा घाइते भएकी बृद्धालाई उपचारका लागि मेची अस्पताल भद्रपुरमा लगिएको थियो । उनको उपचारकै क्रममा बुधबार बिहान मृत्यु भएको प्रहरीले जनाएको छ ।

आगोले जलेर चनमायासहित छोराहरु ४९ वर्षीय दिनानाथ र ३२ वर्षीय मदन सापकोटा पनि घाइते भएका थिए । घाइते छोराहरुको भने मेची अस्पतालमै उपचार भइरहेको छ ।

भगीरथको दाहसंस्कारपछि किरियामा बसेका बेला पानी तताउन ग्यास बाल्ने क्रममा आगो सल्किएर घटना भएको प्रहरीको भनाइ छ ।