इलाम । कोभिड–१९ महामारीका कारण पर्यटकिय क्षेत्र ठप्प छन् । सडकमा चहल पहल कम छ । तर, पुन यो क्षेत्र चलायमान भने अवस्य हुने छ ।

यसलाई मध्यनजर राख्दै इलामको पर्यटकीय नगरी सूर्याेदय नगरपालिकाले यो समयमानै कन्याम लगायत अन्य पर्यटकिय क्षेत्रलाई सजाएको छ ।

अहिले कन्यामले आफ्नो मुहार फेरेको छ । पर्यटकले सधैं खचाखच रहने कन्याम चियाबारीमा नगरले थप पूर्वाधार निर्माण समेत गरेको छ ।

संघीय सरकारसँगको सहकार्यमा नगरले यस क्षेत्रको मेची राजमार्गलाई फराकिलो बनाउँदै सौन्दर्यीकरण गरेपछि कन्याम निकै आकर्षक देखिएको छ ।

सूर्याेदय नगरपालिकाको अवधारणाअनुसार नगर र डिभिजन सडक कार्यालयले कन्यामको मेची राजमार्ग फराकिलो बनाएसँगै यहाँ सौन्दर्य थपिएको हो ।

हरियो चियाबारीलाई बीचबाट चिरेको फराकिलो मेची राजमार्ग ट्राफिक संकेत लाइनले सौन्दर्य थपेको छ । सडकको छेउ–भित्तामा रंगरोगन गरिएको छ । ठाउँ–ठाउँमा सोलार बत्तीसमेत राखिएपछि कन्याम आकर्षक भएको छ ।

फिक्कलदेखि कन्यामसम्मको मेची राजमार्ग फराकिलो बनाउँदै सौन्दर्यीकरण गर्न करिब १० करोड रुपैयाँको काम भइरहेको मेयर रणबहादुर राईले बताए ।