काठमाडौं । एमाले नेता योगेश भट्टराईले नेताहरुको अहंकार र शक्तिको टकराबका कारण हरेक क्षेत्रको नेतृत्व खतरामा पर्दै गएको बताएका छन् ।
गण्डकी प्रदेशमा एमालेको सरकार विस्थापन भएर शनिबार काँग्रेसको नेतृत्वमा गठबन्धन सरकार बनेपछि नेता भट्टराईले फेसबुकमार्फत आफ्नो प्रतिक्रिया सार्वजनिक गर्दै गण्डकीमा एमालेले सत्ता गुमाउनुको कारण नेताहरुको अहंकार र शक्तिको टकराब भएको उल्लेख गरे ।
उनले लेखेका छन्, ‘नेताहरुको अहंकार र शक्तिको टकरावमा कति पृथ्बी सुब्बाहरु पिल्सीनु पर्ने हो? ईन्द्रलाल सापकोटा र बिष्णु पन्थी जस्ता कतिले सत्ताको तिरस्कार सहनु र अग्नी परिक्षामा सामेल भईरहनु पर्ने हो ? सबै प्रदेशमा दलका काम कार्वाहीको पुनः संरचना गर्न ढिला नगरौं ।’
नेकपा खारेज भएसँगै गण्डकीमा एमालेको सरकार अल्पमतमा परेको थियो । तर, जनमोर्चाले समर्थन दिने भएपछि सरकार जोगिएको थियो । तर, एमालेको विवादका बीच जनमोर्चाले समर्थन फिर्ता लिएपछि एमाले गुरुङ अल्पमतमा परेका थिए ।
विहीबार प्रदेशसभामा निवर्तमान मुख्यमन्त्री पृथ्वीसुब्बा गुरुङले प्रदेशसभामा विश्वासको मत गुमाएका थिए । फेरि सरकार बनाउने उनको प्रयास सफल हुन सकेन । शनिबार काँग्रेसका कृष्णचन्द्र नेपालीको गण्डकीको दोस्रो मुख्यमन्त्री नियुक्त भएका छन् ।